Þorgerður Katrín

Vér mótmælum allir

Flest okkar höfum við gert plön um framtíðina, þannig að allur niðurskurður, hvort heldur það eru laun eða annar niðurskurður kemur illa við okkur öll.  Við getum alveg endalaust mótmælt öllum niðurskurði og talað um vitlausa forgangsröðun.

En ég frábið mér að hlusta á Þorgerði Katrínu Gunnarsdóttur mótmæla,eða yfir höfuð tjá sig um niðurskurð.  Vegna hvers?  Hún og hennar ríkisstjórn lagði grunninn að vandræðunum sem við erum í og þurfum að takast á við. 

Ef hún og aðrir kúlulánahafendur myndu borga það sem þau tóku að láni til að auka hag sinn og graðka til sín í góðærinu þá þyrftum við ekki að skera niður í velferðarkerfinu.  Mig minnir að hún og hennar maður hafi tekið að láni fast að 1 milljarði.  allavega 1/3 af því sem þarf að skera fæðingarorlof niður......

Þorgerður Katrín!  hafðu vit á því að þegja og hættu að troða á siðferðisvitund þjóðarinnar.

Skerðingu fæðingarorlofs mótmælt

Vonandi gefur þú þér tíma til að lesa þetta.

Tekið úr DV  

Bréfið sem Mogginn birtir ekki

Áskrifandi Morgunblaðsins mótmælir ráðningu Davíðs Oddssonar í ritstjórastól í byrjun október síðastliðins. Nú skrifar annar áskrifandi opið bréf til Davíðs. Heiða Helgadóttir.

Mánudagur 16. nóvember 2009 kl 11:19

Höfundur: Ritstjórn DV ([e-mail])

• 

  Ingi Gunnar Jóhannsson, höfundur bréfsins.

• 

  Óskar Magnússon, útgefandi Morgunblaðsins.

• 

  Fyrrverandi áskrifandi skrifaði Davíð Oddssyni, ritstjóra Morgunblaðsins, opið bréf, sem Morgunblaðið hefur ekki birt.

Fyrir rúmum tveimur vikum síðan sendi Ingi Gunnar Jóhannsson, fyrrverandi áskrifandi að Morgunblaðinu, bréf til blaðsins og bað um birtingu. Bréfið hefur ekki fengist birt í Morgunblaðinu.

Eftir að hafa ítrekað erindi sitt við Morgunblaðið fór Ingi Gunnar fram á það við DV að birta bréfið. Hér með er orðið við þeirri ósk og bréfið birt í heild sinni.

Opið svarbréf til ritstjórans Davíðs Oddssonar

Í byrjun október s.l. barst mér bréf frá Morgunblaðinu, undirritað af yður, í kjölfar þess að ég sagði upp áskrift minni að blaðinu. Ástæða uppsagnar minnar á blaðinu er sú ein, að mér misbýður verulega það dómgreindarleysi eigenda Morgunblaðsins að gera yður að öðrum tveggja ritstjóra þessa hingað til ágæta blaðs.
Í bréfi yðar buðuð þér mér eins mánaðar fría áskrift að Morgunblaðinu í október til þess að leggja mat á hvernig blaðið muni þróast undir yðar ritstjórn. Jafnframt óskuðuð þér í bréfinu eftir athugasemdum mínum um störf yðar, án þess að tilgreina sérstaklega við hvaða störf er átt.
Ég tek yður á orðinu og skal nú verða við hvoru tveggja; gera yður grein fyrir áliti mínu á störfum yðar fram til þessa og lýsa jafnframt skoðun minni á þróun blaðsins nú í október.

Störf yðar
Sem forsætisráðherra nutuð þér lengi vel trausts og virðingar þjóðarinnar og höfðuð sem slíkur á yður hið “landsföðurlega” yfirbragð, sem svo mikils er metið.
En við einkavæðingu ríkisbankanna urðu yður á afdrifarík mistök. Í stað þess að dreifa eignarhaldinu eins og lofað hafði verið, handstýrðuð þér bönkunum í hendur manna, sem ekki reyndust traustsins verðir. Með því lögðuð þér því miður grunninn að þeim hörmungum sem nú hafa dunið á íslenskri þjóð, og ekki sér fyrir endann á.
Í hlutverki Seðlabankastjóra gáfuð þér bönkunum að því er virðist lausan tauminn, og gátu þeir því óhindrað stækkað, safnað óheyrilegum skuldum og belgst út án þess að þeim væru nein takmörk sett. Þér stóðuð meir að segja fyrir því að afnema bindiskylduna í útibúum íslenskra banka erlendis. Afleiðingar þessa voru vægast sagt skelfilegar, og allir landsmenn þekkja nú af biturri reynslu þá afurð einkavina yðar í Landsbankanum sem Icesave nefnist, og þér hafið sjálfir lýst sem hinu mesta skemmdarverki.

Þótt þér segist nú oftsinnis hafa varað við yfirvofandi hruni bankanna þá samþykktuð þér samt gegndarlausar lánveitingar Seðlabankans til þessara sömu banka án haldbærra veða, og sætir það furðu í ljósi hinna meintu viðvarana yðar. Beint fjárhagslegt tap þjóðarinnar af þessum sökum er talið nema allt að 300 milljörðum króna að viðbættum vöxtum. Undir yðar handleiðslu varð Seðlabanki Íslands, þjóðarbankinn sjálfur, í raun gjaldþrota. Spyrja má í þessu samhengi, hvort sá sé meiri óreiðumaður sem sólundar því fé sem hann fær að láni, eða bankastjórinn sem veitir honum lánið úr sjóðum almennings, vitandi að það fáist að öllum líkindum aldrei greitt til baka.

Misheppnuð tilraun yðar til yfirtöku á Glitni olli dóminóáhrifum og hratt af stað því skelfilega hruni, sem landsmenn standa nú frammi fyrir sem blákaldri staðreynd. Setning hryðjuverkalaga á íslenskar eigur í Bretlandi hefur þar að auki verið rakin beint til orða yðar í Kastljósi um að skuldir íslenskra "óreiðumanna" erlendis yrðu ekki greiddar, og var viðtal þetta víða erlendis túlkað sem yfirlýsing Seðlabankans um að íslenska ríkið myndi ekki standa við alþjóðlegar skuldbindingar sínar.
Í kjölfarið hófst svo Icesave-deilan við Breta og Hollendinga, en þar getið þér ekki heldur þvegið hendur yðar af því að hafa sem Seðlabankastjóri í nóvember 2008 undirritað viljayfirlýsingu þar sem því var lofað að Íslendingar tækju ábyrgð á innlánsreikningum Landsbankans erlendis. Lyktir málsins hljóta því að hluta til að skrifast á yðar reikning.
Sem forsætisráðherra og síðar sem Seðlabankastjóri berið þér óumdeilanlega mikla ábyrgð á afdrifaríkum ákvörðunum, sem reynst hafa rangar og leitt hafa miklar hremmingar yfir íslenska þjóð. Því miður reyndust þér, þegar á hólminn var komið, alls ekki valda því bankastjórastarfi sem þér höfðuð áður úthlutað yður sjálfum.

Þróun blaðsins
Í ljósi ofangreindra stikla af starfsferli yðar eru efnistök Morgunblaðsins, eftir að þér hófuð þar störf, einkar ógeðfelld. Blaðið hefur á þessum stutta starfstíma yðar ítrekað reynt að vísa allri ábyrgð á Icesave klúðrinu yfir á núverandi ríkisstjórn, sem þó er í raun réttri einungis að sinna björgunarstörfum við erfið skilyrði. Auk þess hafa ýmsar tilraunir verið gerðar á síðum blaðsins til þess að „útskýra“ orsakir gjaldþrots Seðlabankans yður í hag, t.d. í Reykjavíkurbréfi þann 18. október.
Nýjasta útspil yðar til þróunar Morgunblaðsins, að breyta sunnudagsblaðinu í eins konar “kálf” með laugardagsblaðinu, er að mínu mati augljós tilraun til þess að gefa lesendum einu tölublaði minna á viku fyrir sama verð. Það vekur jafnframt athygli hversu blaðsíðum Morgunblaðsins hefur farið fækkandi að undanförnu. Eða stendur kannski til að lækka áskriftargjaldið vegna þessa?
Í stuttu máli er það mat mitt á þróun Morgunblaðsins á þessum fyrsta mánuði yðar í ritstjórastól að blaðið hafi í raun misst allan sinn fyrri trúverðugleika, einkum hvað varðar umfjöllun um bankahrunið og ýmis málefni sem tengjast fyrri störfum yðar. Ritskoðun af yðar hálfu gerir það einfaldlega að verkum að hvorki er lengur hægt að treysta fréttavali né efnistökum í fréttum blaðsins.
Það sjá það líklega flestir skyni bornir menn, hvílík reginfirra það er að gera yður að ritstjóra blaðs, sem ekki kemst hjá því á umbrotatímum í lífi þjóðarinnar að fjalla beint og óbeint um ofangreind störf yðar á opinberum vettvangi. Þér eruð einfaldlega engu skárri í nýjum „Moggafötum“ en keisarinn frægi í sögu H.C. Andersens, sem allir sáu að var nakinn nema hann sjálfur. „Moggafötin“ fela ekki fortíð yðar frekar en nýju fötin nekt keisarans. Er yður hér með kurteislega bent á það.

Biðjið þjóðina afsökunar
Með framgöngu yðar í opinberu starfi á undanförnum árum hafið þér því miður valdið íslenskri þjóð stórkostlegu tjóni. Þótt slíkt hafi eflaust ekki verið ætlun yðar, þá tala samt staðreyndirnar sínu máli. Hvort sem yður líkar það betur eða verr, þá eruð þér Hrunkóngur Íslands. Þann titil munið þér aldrei losna við, hversu mjög sem þér reynið að ritstýra og hagræða sannleikanum í yðar þágu á síðum fyrrum „blaðs allra landsmanna“.
Það eru gömul sannindi og ný að hrokinn gerir menn smáa en auðmýktin stóra. Væri yður sæmst að horfast í augu við þátt yðar í hinu efnahagslega hruni Íslands og biðja þjóðina afsökunar á því sem að yður snýr í auðmýkt og iðrun hjartans. Yrðuð þér þá maður að meiri. Ég er sannfærður um að amma yðar hefði ráðlagt yður hið sama, væri hún enn á lífi.

Uppsögn mín á Morgunblaðinu stendur þar til þér víkið af velli sem ritstjóri blaðsins.

Reykjavík, 30. október 2009
Ingi Gunnar Jóhannsson, fyrrverandi áskrifandi Morgunblaðsins

 

ÞETTA ER EKKERT GRÍN!

Ég heiti því að Morgunblaðið mun ég ekki kaupa né lesa á meðan Davíð Oddson fær opinberlega að stýra blaðinu. Ég hef haft það fyrir sið s.l. þrjátíu ár að lesa jarðafaratilkynningar og minningargreinar í Mogganum, en ég mun láta allt slíkt fram hjá mér fara.  Moggabloggið hefur einnig verið mikill tímaþjófur, en nú mun Fésbókin, Barnaland og kannski Vísir.is taka tíma minn.

Afhverju er ég að tilkynna þetta sérstaklega mun einhver spyrja sig, því ekki hef ég verið öflug og ekki á ég mér marga aðdáendur.  Ég tilkynni þetta til að fá útrás fyrir hryggð minni með að nokkur skuli enn hafa trú á þessum manni sem að mínu mati hefur farið svona með okkar þjóð.

Að mínu viti og flestra þeirra sem ég hef hitt og talað við er Davíð Oddsson með góðri hjálp Hannesar Hólmsteins Gissurasonar sökudólgur númer 1 í okkar efnahagshruni.  Hann innleiddi þessa siðspilltu frjálshyggju sem varð okkur að falli.

Ég ætla að neita mér um sterkar yfirlýsingar, fara að dæmi nýgiftrar bloggvinkonu og vera stillt.  Hvað ég geri í hljóði er annað mál.

Ég kveð ykkur að sinni og óska þess að mér gefist færi á að hitta ykkur á Fésinu eða annar staðar.

Lifið heil!

Ingibjörg F. Ottesen

Davíð og Haraldur ritstjórar

Sveiattan skítalykt.

Hér með og kannski örlítið fyrr lýkur stuðningi mínum við Ólaf Ragnar Grímsson.  Hann vissi um brotalamirnar í íslenskri bankastarfsemi, en hvorki sagði né gerði neitt, nema að mæra útrásarvíkingana og vera í slagtogi með þeim.

Ojbarasta,  Nú held ég að búsáhaldabyltingin mínus Hreyfingin eigi að koma saman fyrir utan Bessastaði og hrekja forsetan úr embætti.  Hann er ekki hæfur. Hann fari frá, hann fari frá!

Íslensku bankarnir störfuðu samkvæmt reglum

Til hamingju Jens

Ég fylgdist vel með úrslitum kosninganna því mér finnst okkur koma það við hvernig bræðrum okkar og systrum vegnar.

Ég er afar óhress með að SV hafi tapað fylgi sérstaklega af því að það er umhverfisvænn flokkur og einna líkastur Vinstri Grænum.  Kristín Halvorsen er glæsilegur foringi og ég hefði viljað sjá hana auka fylgi við flokkinn á kostnað Sentralpartiet sem er Framsóknarflokkur þeirra Norðmanna. 

Ég er í skýjunum yfir Jens og félögum, þeir juku fylgi sitt og ljóst er að það verður áfram rauð græn stjórn í Noregi.

Heimurinn þarf síst á að halda öflum sem eru í Fremskritspartiet og Högre sem eru Frjálslyndir og Sjálfstæðisflokkur.

Áfram Stoltenberg og félagar!

Stoltenberg sigurvegarinn

Til hamingju Eiður!

Ég væri ekki að segja satt ef ég teldi þetta hafa verið skemmtilegan fótboltaleik.  En ég er afar þakklát þeim sem standa eða stóðu að því að fá Monakó leikina sýnda hér.  Það sást greinilega að Eiður var að feta sig inn í nýjan leikstíl, en það sást líka að hann var yfirburðarmaður á vellinum.  Fótavinna, móttaka á bolta og sendingar voru mun markvissari hjá honum en félögum hans.

Lengi lifi íþróttafólkið okkar!

Eiður Smári: Tekur tíma til að aðlagast hlutunum

Þetta er varla íslenska útgáfan.

Mér er það alveg svakalega minnisstætt frá unglingsárunum, þá kynntist ég ungri konu sem ég þekki enn.  Hún sagði mér að ég skyldi muna að ef ég vildi einhverju ná fram og halda strákunum volgum, þá skyldi ég ekki leyfa þeim það. 

Ég hef notað þetta ágæta ráð og tekist vel upp.  Reyndar skildi sá fyrri við mig eftir 2 áratugi, en sá seinni heldur enn út og er að ég held býsna ánægður með mig og´sambandið komið á þriðja áratug.

Ég mátti til, mér finnst þetta svo fyndin frétt.

Góðar stundir!

Kynlíf fyrir heimilisfriðinn

Koma svo Steingrímur og Jóhanna!

Nokkur orð til Jóhönnu og Steingríms.

Ef að þið eruð í hagsmunagæslu fyrir fáeina útvalda, þá skuluð þið ekki hlusta á Joseph Stiglitz, en ef að þið teljið ykkur vera kosin á þing til að gæta að þjóðaröryggi, hagsmunum fólksins í landinu, þá skuluð þið ráða Joseph Stiglitz sem sérstakan efnahagsráðgjafa og fara eftir því sem hann segir.  

Ekki gera eins og fyrirrennarar ykkar, þeir Davíð, Halldór, Árni Matt, Valgerður og fleiri ódámar gerðu, en þau eiga skuldlaust nánast alla sök á hvernig komið er fyrir okkur þar sem þau  skelltu skollaeyrum við háværum aðvörum sem komu frá Stiglitz og fleirum.

Íslendingar vilja sjá Evu Jolie til að rannsaka hrunið og Joseph Stiglitz til að hjálpa okkur við endurreisnina.Ef að þau fengu að ráða, þá yrði heldur betur hreinsað til í bönkunum og jafnvel líka í stjórnarráðinu.

Fyrir ykkur sem ekki vitið hvað orðið: ódámur merkir, skal það upplýst hér að það þýðir sk. Íslenskri orðabók: þorpari, illmenni, mannhrak, úrhrak og óþokki.

 

Mistök að nýta ekki auðlindirnar

Frábært

Það er gott að einhver gerir það gott án þess að ræna banka eða eitthvað þaðan af verra.

Eiður Smári er betri landkynning en flestir þeir Íslendingar sem hafa verið í sviðsljósinu undanfarin ár.  Við getum verið stolt af íþróttafólkinu okkar bæði stelpum og strákum.  Þetta eru krakkar sem leggja mikið á sig og þurfa að færa miklar fórnir til að ná svona langt. 

Ég hef heyrt öfundarraddir þeirra sem finnst allt of miklir peningar séu í fótboltanum og það nái ekki nokkurri átt að menn séu að þéna svona margar milljónir fyrir það eitt að sparka í tuðru.Ég hef ákveðið að hafa ekki neina skoðun á því hvað fótboltamenn og konur þéna, svo lengi sem þau ráðast ekki inn á bankareikningana mína, eða lífeyrissjóð. 

 Ég er svo heppin að hafa vinnu og geta keypt mig inn á Völlinn og núna er minn heittelskaði búinn að bjóða mér á Anfield  10 desember til að sjá okkar menn taka á móti Arsenölum.  Já minn karl veit sko hvernig hann á að hafa kerlinguna góða.   

 

Eiður Smári skrifaði undir

Ekki veitir af

Hvað með góðan miðvörð?  Ég hef sagt það áður og segi það enn.  Liverpool vantar miðjumenn og ég gæti séð Eið okkar Smára alrauðan.  Víst hefur Eiður hraunað svolítið yfir Liverpool, en það er skiljanlegt, honum hefur ekki gengið sem best á móti þeim.

Ég er viss um að Eiði gengi betur með þeim en á móti. Veit einhver símanúmerið hjá Benitez?

Benítez að bæta í vörn Liverpool?